|
Info-Web Gaita Asturiana
Info-Web gaita asturiana ye un serviciu gratuitu d'envíu de noticies acerca'l mundu la gaita
a los sos suscriptores.
Info-Web gaita asturiana obtien la so información d'aquella xente que quier difundir
daqué d'interés común de los gaiteros. Por ello nun se responsabiliza de la posible falsedá
o error d'algunes d'elles, asína como de les sos repercusiones nos distintos ámbitos.
17-XII-2002
Presentación del discu de la Raitana
La Banda de Gaites La Raitana de Nava y Piloña presenta esti domingu 21 d'avientu'l so primer discu "De La Revuelta a La Marea".
L'eventu tendrá llugar nel Auditoriu d'Uviéu, ena Sala de Cámara a les 21:00h. Ena actuación participarán distintos músicos amás
de los componentes de la banda. Asína mesmu, pa la ocasión estrenarán nuevos traxes, copiaos d'unes semeyes de principos de sieguo
de la zona d'onde proceden los componentes de la mesma.
Informa: Olaya García
Nuova web de Nalgañu
http://www.bandagaitesnalganu.com
Cursos maxistrales de gaita bretona
La empresa Les Xanes S.A. patrocina'l cursu qu'entama la Delegación Asturiana del Festival Intercélticu de Lorient, y coincidiendo col 15 Aniversariu de la empresa FonoAstur, los díes 28 y 29 d'avientu al rodiu de:
Clases maxistrales de Jean Baron y Christian Anneix (http://baron-anneix.ifrance.com) sobre música bretona.
Dambos son ún de les meyores pareyes de músicos de la Bretaña y son xuraos del troféu Macallan de Gaita nel Festival Intercélticu de Lorient.
Estes clases van dirixíes a Campeones del troféu Macallan, Mayestros Gaiteros y Direutores de Bandes de Gaites Asturianes (los cuales recibirán notificación por carta), yá que dende l'añu que vien en dicho troféu habrá que participar, amás de gallegos y asturianos, con bretones intérpretes de Veuze, teniendo qu'interpretar cancios de la rexón de Nantes, zona orixinaria d'esa gaita.
Ye por ello, y aprovechando la so estancia n'Asturies con motivu los conciertos de FonoAstur, impartiránse clases maxistrales durante dos díes en Villanueva de Santu Adrianu.
Más información nos próximos díes na páxina web http://www.lesxanes.com
5-XI-2002
Morea pónse'l traxe de los Humanitarios
Morea d'Ayer volverá a ser escenariu del panorama del folklor astur nel día de Los Humanitarios de S. Martín.
El vienres día 8 de payares podremos ver nel Nuevu Auditoriu "Cine Carmen" a partir de les 20:30h l'espectáculu
"Tocando pelos Pueblos" a Andecha Folklor d'Uviéu, Criatura Verda (Catalunya) y Lautari (Aragón).
El domingu a les 20:00h nel mesmu local actuará La Bandina, el Coru d'Humanitarios de S. Martín y la cantante Mari Luz Cristóbal Caunedo.
El llunes, día grande de S. Martín, bandes de gaites desfilarán peles cais de la villa hasta les 20:00h, onde na plaza principal
actuarán La Vierbene y La Bandina que pesllarán la fiesta.
3-XI-2002
III Alcuentru Folklóricu Nacional S. Martín de la Carrera Nalgañu
Los próximos díes 9 y 10 de Payares tendrá llugar el III Alcuentru folclóricu Nacional San Martín de La Carrera (Siero)
(Ente Pola Siero y El Berrón) colos siguientes participantes:
Banda Gaites Amigos do Mosteiro de Melón (Galicia)
Banda Gaites "El Trasgu" de Campu Casu
Banda Gaites Nalgañu (Siero)
Grupu Folclóricu "Los Yerbatos" Bimenes
Grupu Folclóricu "Peña´l Vientu" Campu Casu
Coru Ronda Altamira (Santander) - Canción Marinera, Habaneras, Pasiega...
Coru Amigos de la Música de Santoña (Cantabria) -Canción Marinera, Habaneras, ....
Orfeón Condal de Noreña - Con Temes clásicos y asturianos.
Pin de la Cotoya - Monologuista y Presentaor
Programa
- Sábadu 9
17.00 hores: Pasucais
18.00 hores: Festival
21.00 hores: Espicha (hasta l'amanecer), repartu'l bollu y demás caxigalines ente los nuesos socios.
- Domingu 10 (El que se puea llevantar)
12.30 hores: Misa de Campu.
Informa: Pablo A. Díaz
20-X-2002
Llariegu nuova campeona de les bandes asturianes
La banda gaites Llariegu de Sariegu foi proclamá esta mañana nuova vencedora del II Campeonatu Nacional de
Bandes de Gaites Asturianes organizáu pola FIGA.
La banda de Eugenio Otero tuvo una espectacular presencia na carpa que inauguró a les 12h.
Esta ye la relación de premios:
Campeón: B.G.Llariegu
Subcampeón: B.G. Villaviciosa-El Gaitero-Ribesella
Meyor percusión: B.G. Llariegu
Meyor estética: B.G. La Tayuela de Mecer
Meyor Asturies esterior: B.G. La Tayuela de Mecer
Y el correspondiente órden de clasificáos (la lista detallá de puntos publicaráse en breve):
1º B.G. Llariegu
2º B.G. Villaviciosa-El Gaitero-Ribesella
3º B.G. La Tayuela de Mecer
4º B.G. La Reina del Truébano
5º B.G. Candás
6º B.G. Xácara
7º B.G. Corvera d'Asturies
4-X-2002
Acércase'l II Campeonatu Bandes
El 20 d'ochobre celebraráse'l II Campeonatu Bandes de Gaites Asturianes en Xixón, organizáu pola FIGA. Ensin embargu,
a pesar de les expectaciones creáes pa esti añu, el campeonatu recíbese con desilusión pola falta d'afluencia de bandes que se nieguen
a participar o que tienen problemes internos. Sentíos son los problemas xurdíos en grandes bandes como Villa de Xixón o
Corvera d'Asturies o la desapaición del grupu gaites de Valladolid, bandes que participaron na anterior
edición y que esti añu por razones obvies nun lo fadrán.
Ensin embargu l'eventu seguirá p'alantre y otru añu podremos disfrutar d'esti espectáculu gaiteru a la orilla'l Piles.
Les nueves tecnologxíes lleguen a la gaita
La direutiva de la industria química DuPont presentó ante la prensa nes sos instalaciones de Carreño (Asturies)
un de los productos más orixinales producíos cola so gama de materiales, la gaita de Corian(R) producía pola empresa
Les Xanes S.A. de Santu Adrianu.
Esti material aporta según la Universidá d'Uviéu meyores rendimientos
que cualesquier maera considerá cuna estabilidá dimensional ante cualquier situación
térmica y medioambiental non comparable a nengún material utilizáu n'instrumentos musicales hasta'l momentu. Al actu
acudieron representantes del Principáu asína como de l'Ayuntamientu de Xixón que recibió una gaita d'esti novedosu material pa'l
Muséu de la Gaita.
|
Ties noticies, anuncies sobre gaita, dalgún comentariu ... escribe: 
Date d'Alta'l Info-Web Gaita Asturiana
Baxa'l Info-Web Gaita Asturiana
|
|
