Deportes

Asturies tien qu’abandonar la primer fase del Campeonatu d’España de Selecciones de Rexones UEFA, tres que los de Roberto Robles perdieran énte Canaries. Los asturianos xugaron l’últimu partíu ensin opciones, yá que na anterior xornada, Aragón, que yá ganara a Asturies, y Canaries empataron a ceros.

La selección vasca nun va xugar per segundu añu’l so tradicional partíu de Navidá. Si l’añu pasáu foi pola negativa de los xugadores a vistir la camiseta d’Euskadi, en llugar del tradicional Euskal Herria, esti añu ye’l plantón de la Real Sociedad, que diz que nun quier xugar daqué que se ta convirtiendo nuna fiesta navidiega con tastu folclóricu.

Juan Pablo evitó’l desastre en Chapín y fixo que’l Sporting lleve yá seis selmanes ensin perder. L’equipu xixonés dominó nel primer tiempu, estrellando dos balones nos postes, pero’l Xerez lluchó enforma na segunda parte, faciendo méritos pa una victoria que Juan Pablo evitó con grandes paraes. Keita foi’l que más fixo por marcar gol per parte del Xerez. L’equipu xixonés sumó un puntu que xunto’l restu de resultaos de la xornada permiten que’l Sporting quede na séptima plaza.

El Sporting podría dicise que salvó un puntu n'El Molinón frente a un Zaragoza que foi meyor a lo llargo de casi tol partíu. Mientres los visitantes dominaron el xuegu, abrieron el campu y llegaron al área en numberoses ocasiones, un irreconocible Sporting limitóse a xugar a arreones, con un centru del campu desapaecíu y un ataque casique inéditu. En definitiva un puntu qu'hai que dalu por bonu.