Esti martes, Coxersa anunció l’encargu d’un ‘Plan ponte’ que proponga alternatives pal tratamientu de residuos a partir del 2015. La Coordinadora acusa al consorciu de tresmitir falsedaes a la población pa xustificar la incineradora.
Mediu Ambiente negó los datos sobre l’aumentu de bencén nel aire daos conocer pol Coleutivu Ecoloxista d’Avilés, acusando a esta organización de “xenerar una alarma innecesaria”. L’asociación amosó la so indignación por esta postura.
L’autorización que permite a Industrias Doy-Manuel Morate, S.L. llegalizar 17 fornos na batería B33 y trés descargaderos de carbón foi criticada esti xueves pola Coordinadora Ecoloxista d'Asturies. Afirmen que la empresa trabaya en precario.
El BOE d’esti martes anunció l’autorización de la central de ciclu combináu de 410 MW promovida por Endesa en La Perea. La Coordinadora llamenta que’l PSOE atara esta instalación tando en funciones y ensin contar cola opinión vecinal.
La Coordinadora Ecoloxista d’Asturies decidió entregar la Bullada de Purpurina d’esti añu a Francisco Álvarez-Cascos. El xuráu considera al presidente responsable principal “de la política ambiental mala desarrolla pol Gobiernu”.
La esistencia de dos basureros illegales na redolada del Cabu Peñes esmolez a la Coordinadora Ecoloxista d’Asturies. El coleutivu denunció esta situación al Conceyu de Gozón, al que reclama la retirada inmediata de los residuos.
El xulgáu de lo Contencioso-alministrativo númberu 1 d’Uviéu estimó un recursu contra l’alcuerdu de la Xunta de Gobiernu de Coxersa pal aniciu de los trámites de la incineradora. El xuez condiciónala a la modificación del Plan de Residuos.
La Coordinadora Ecoloxista d’Asturies presentó alegaciones al trámite d’información pública del parque eólicu d’Ourubio. Los ecoloxistes nun ven xustificable l’aumentu considerable del tamañu de los aeroxeneradores.
La Coordinadora Ecoloxista d’Asturies refuga l’ampliación del areneru del Fontanón, cerca del núcleu poblacional xixonés d’El Gallinal (Serín). El coleutivu denuncia que la esplotación a cielu abiertu nun cumple cola norma ambiental actual.
El Coleutivu Ecoloxista d’Avilés alertó al Gobiernu y al Seprona sobre l'apaición d’un vertíu nuevu na ría esta fin de selmana que provocó la muerte de docenes de pexes. Critiquen la permisividá de l’Alministración ante esti tipu d’aiciones.
La Confederación Hidrográfica del Cantábricu (CHC) va acondicionar el calce de los regueros La Braña y La Raíz, en Cangas. D’esta forma, cúmplese una demanda vieya de la Coordinadora Ecoloxista y los vecinos de Xichón.
L’aprobamientu de la matanza de 240 cuervos cagalones llevó a dellos grupos ecoloxistes a acusar al Gobiernu de movese presionáu por coleutivos de pescadores. Critiquen “la falta de polítiques de conservación de la fauna salvaxe”.
L’Axencia Europea del Mediu Ambiente dio a conocer un informe sobre’l costu de la contaminación industrial a los estaos miembros. Nella, inclúise un llistáu coles plantes más contaminantes, con dos asturianes ente les cien primeres.
L’ex ciclista profesional Chechu Rubiera va participar esti domingu nuna marcha ciclista per Xixón en protesta contra l’alta tensión y en defensa del mediu ambiente. Ésta va tener salida n’El Rinconín al meudía y va acabar na Plaza Mayor.
La proposición non de llei del PP presentada na Xunta Xeneral pa llegalizar l’ocalitu nitens salió alantre col apoyu del PSOE. La Coordinadora Ecoloxista critica esta decisión pola peligrosidá que supón esta especie pa les viesques tradicionales.
Na mañana del miércoles, los avilesinos y visitantes del Centru Niemeyer pudieron comprobar la esistencia d’un vertíu na ría y la presencia de peces muertos. El Coleutivu Ecoloxista d’Avilés denunció esta situación al Seprona y al Gobiernu.
L’aumentu de la temporada de pesca d’angula reclamáu polos anguleros de les cofradíes de L’Arena y Cuideiru, foi criticáu pola Coordinadora, que reclama una veda inmediata. Tamién denuncia que’l Gobiernu “quier acabar col salmón”.
El teixu de Parmu, nel conceyu de Teberga, ta en peligru seriu por unes obres que tán faciéndose nel pueblu. Dende la Coordinadora Ecoloxista d’Asturies reclamen al Gobiernu que paralice los trabayos.
La Coordinadora Ecoloxista d’Asturies criticó esti llunes la resolución del Gobiernu de formular la declaración d’impactu ambiental a la cantera de Peḷḷuno. Los vecinos y grupos ecoloxistes veníen denunciando munches irregularidaes nella.
L’Alianza Global por Alternatives a la Incineración, de la que forma parte’l Conceyu, celebra esti vienres el Día d’Aición Global contra los Residuos y la Incineración. El coleutivu refuga l’usu de fondos públicos “pa financiar enerxíes sucies”.
.jpg)
