Vitor Suárez

Tiempu d'análisis políticos (na rede Internet)

Como militante independiente d’una de les formaciones polítiques que concurrió a estes eleiciones: Bloque por Asturies-UNA, nun me correspuende a min públicamente nin facer autocrítica, nin análisis nengún de los resultaos obteníos, que per otru llau tán ehí pa velos. Lo que tenga que dicir dirélo (y dixilo) nos cauces internos de los que dispon la coalición pa facelo. Tampoco nun voi facer análisis nengún de los resultaos obteníos por URAS-PAS y Conceyu Abiertu, sedrán estes organizaciones les que consideren la so estratexa a siguir nesti panorama políticu, tan difícil pal asturianismu, que mos toca sufrir/vivir.
 
Son munchos los análisis políticos post-eleutorales que tán surdiendo na rede Internet estos díes últimos, munchos los comentarios nos diarios dixitales y dellos los artículos espublizaos nos blogues que tovía tán activos y dan dalgo de vida al asturianismu n’Internet, que tanto s’alimenta de la polémica (del que yo nun niego la mio participación).
 
Tán dándose lleiciones de lo que se fizo mal nestes eleiciones de 2011.Tán dándose lleiciones de lo que tendríen que facer les formaciones polítiques del asturianismu d’equí a 2015. Y tán dándose sentencies de muerte y ultimátums al nacionalismu asturianu.
 
Ente les esixencies más repetíes que podemos topar, tán les siguientes: 1) Xuntanza de los partíos asturianistes presentaos en 2011; 2) Renovación de los cabezaleros políticos; 3) Fechura d’un congresu de nacionalistes asturianos.
 
Vamos por puntos:
 
1) Xuntanza de los partíos asturianistes presentaos en 2011
Ye evidente que tamos nuna situación complicada, onde nin sumando los votos de les trés fuercies polítiques que se consideren na ecuación (Bloque por Asturies-UNA, PAS y Conceyu Abiertu) podríemos algamar el diputáu. Sobre esti fechu, habría que discutir si toos tenemos como oxetu esi diputáu o si se quier priorizar el trabayu nos conceyos (postures entrambes les dos, igual de válides). Paezme, tamién, qu’hai una cosa clara: la decisión (política) d’algamar o non esa xuntanza corresponderá únicamente a les formaciones implicaes, per aciu de les decisiones tomaes pola so militancia y que dicha xuntanza habrá de tener un oxetivu práuticu y habrá de facese sobre un alcuerdu ideolóxicu que quiciás non tol mundu ta dispuestu a asumir.
 
2) Renovación de los cabezaleros políticos
Un tema que se vien falando bien de tiempu nel asturianismu, pero pal que nadie ta aportando soluciones. Si ye verdá que toos y caún de los que tán pilotando les organizaciones polítiques nun valen o nun tán sabiendo facelo ¿Quién toma’l relevu? Yo nun comparto esta postura. Tenemos xente mui válido y esta campaña demostróse.
 
3) Fechura d’un congresu de nacionalistes asturianos
Esti puntu ye’l que más me llama l’atención pola fácil igua que tien pa los interesaos. Pueo entender que les dinámiques internes de los partíos, tocantes a conversaciones ente los mesmos o la cuestión de los cabezaleros, puea xenerar rocea a la xente ensin militancia, pero nun lo entiendo pa un actu como esti. Si se quier convocar un congresu, hai bayura d’espacios públicos afechiscos pa facelo y animo a la xente que defende esta idea a que lo faiga, porque de xuru que resultaría interesante.
 
Pa rematar, lo que quiero dicir a tola xente descontento, que ta viendo de lloñe o dende la pasividá tou esti procesu… ye que, tamos en xornada de reflexón, sí. Toos y caún de los que queremos un futuru meyor pa esti país. Pero, pa nada, tamos en xornada d’inaición, queda muncho por facer y por caminar. Pero pa echar a andar siempre fai falta un primer pasu. Anímovos a dalu.

Comparte...                                    

Enllaz permanente