Suburbia Ediciones presenta cinco novedaes lliteraries

Cuatro llibros de narrativa y ún dedicáu a primeros llectores conformen les novedaes de Suburbia Ediciones pa estes feches navidiegues. D’esta forma, la editorial fina un añu 2011 cargáu d’espublizaciones.
 
‘Nel circu lusu’, de Llucía Tejerina con ilustraciones de Marcos Vigo, ye’l nome de la primera aventura de Sira, “una neña perinquieta, sorriyona y imaxinativa”, pero non la última, según señalen dende la editorial. Esta obra, de la coleición de lliteratura infantil ‘Camín de Bree’, ta orientada a primeros llectores.
 
Ente los títulos nuevos de narrativa atopamos ‘Teoría de la pertenencia’, de Ramón Lluis Bande, “ una coleición de proses autónomes que, mui probablemente –queda a xuiciu del llector–, conformen, con una serie d'enllaces visibles y otros invisibles, una narración unitaria: la d'un personaxe ensin nome en plena tresformación, que sigue buscando les característiques principales que puedan definir la so identidá nel momentu presente”. Son testos escritos “nel actu y con fecha d'entrega, que se negaron a una reescritura y desarrollu posterior, alcontrando nes sos imperfecciones, nel so abandonu, la entidá d'obra acabada”.
 
Xurde Fernández y Marián García tornen a trabayar xuntos en ‘Aeropuertu’ tres ‘El color del escaezu’ y el llibru infantil ‘L’árbol de la verdá’. Esti trabayu nuevu ye “una novela sobre histories cruciaes alredor de dos viaxeros a los qu'intercambien les maletes accidentalmente nun aeropuertu”. A partir d’esti momentu, los autores desarrollen dos histories paraleles hasta llegar a un final conxuntu “sorprendente”.
 
Otra bona llectura va ser ‘Les ruines’, novela perconocida de Xandru Fernández que vive una reedición revisada y correxida pol propiu autor. Nesti llibru, Fernández “usa como escusa a la familia del Rosa l'Alemana y la del so esposu Goyo Godina, militante antifranquista que morrió nun accidente na mina, pa construyir una novela onde, como ye habitual nel autor, la vida los personaxes ta condicionada pol paisaxe, el desarraigu y la falta de comunicación”.
 
El trabayu que completa esti catálogu de novedaes de Suburbia Ediciones ye la obra de teatru ‘Les siete novies del rei’, de Xulio Arbesú, que cuenta la historia d’un monarca que prometió matrimoniu a siete moces. Éstes han de pasar delles prebes pa saber quién ye la supuesta afortunada. Según esplica l’autor, “equí me teníes a mi, que soi de los de tarariar l’himnu de Riego tolos catorce d’abril, escribiendo una obra monárquica dedicada a aquel rei asturianu que, según remotes cróniques, vivió nel valle del Nalón, y valió pa da-y apellíu al conceyu de San Martín. Con un protagonismu tan femenín y numberosu, nun podía asemeyase muncho a ‘La venganza de don Mendo’. Hubi de renunciar a tan prestosu modelu, pero vive Dios que nun contaba renunciar a trés coses: que la obra diba ser cómica, y escrita en versu, y con una escena a base de pallabres esdrúxules”.

Comparte...                                    

Enllaz permanente