Rodríguez Alonso espubliza'l poemariu ‘Palabres d’un tiempu’

L’escritor y historiador xixonés Pablo Rodríguez Alonso ta acabante d’espublizar el so segundu poemariu, ‘Palabres d’un tiempu’. Esta obra, qu’edita Trabe, foi premiada col Nené Losada Rico del añu 2010.
 
“’Palabres d’un tiempu’ ye una obra de madurez, de palabra pausada, pero inquietante”, espliquen dende la editorial. “Abren el llibru versos precisos de quien s’enfrenta a la vida adulta consciente de que les palabres d’esti tiempu son palabres mayores, lloñe de les rises y l’esfrute de la neñez: palabres d’un tiempu ‘fatigáu d’esperances’”, continúa la esplicación del llibru. Asina, l’autor va tocar temes como la desolación de la vida adulta, la perda de la so ma o l’amor, yá sía mirando pal pasáu o pa un presente desgarrador.
 
Esta obra ye la segunda qu’espubliza Rodríguez Alonso (Xixón, 1979) esti añu tres l’esitosu 'De totalitarios a «demócrates». Franquismu, fascismu y nazismu na II Guerra Mundial al traviés del diariu xixonés Voluntad', trabayu qu’algamó’l XII Premiu d’investigación histórica Rosario de Acuña. Como poeta, enantes yá ganara’l Teodoro Cuesta del 2005 gracies a ‘La lluz del nordés’, mentes que como historiador fíxose col V Certamen Cultural Jóvenes Artistas 2005, convocáu pol Conceyu de Cáceres, col ensayu ‘Idioma, nacionalidá y conflictu’.

Comparte...                                    

Enllaz permanente