La XIX Bullada de Purpurina, pa Francisco Álvarez-Cascos

La Coordinadora Ecoloxista d’Asturies decidió entregar la Bullada de Purpurina d’esti añu a Francisco Álvarez-Cascos. El xuráu considera al presidente responsable principal “de la política ambiental mala desarrolla pol Gobiernu”.
 
Esti antipremiu simbólicu pretende facer visibles les aiciones de persones, empreses, instituciones y alministraciones que más destacaron “nel so llabor contra la naturaleza y el medio ambiente asturianu”, pa lo que’l xuráu escueye ente les munches candidatures que los miembros del coleutivu presenten. Esti añu aspiraben a suceder a Francisco González Buendía l’empresariu mineru Victorino Alonso, Coxersa, Rafael Felgueroso, la FSA-PSOE y TEPCO, anque’l ganador final foi’l presidente del país, Francisco Álvarez-Cascos, “polos sos méritos nestos meses escasos que lleva nel cargu” y por ser “el responsable principal de la política ambiental mala desarrollada pol Gobiernu del Principáu nesti tiempu”.
 
Entes les razones que xustifiquen el premiu, los ecoloxistes recordaron les normes establecíes pa la pesca del salmón, “que lu lleven práuticamente al so desaniciu”; les matances de cuervos cagalones, tamién pa satisfacer a los pescadores; y la decisión d’otorgar la llicencia de les mines d’oru de Salave, plegándose “a los intereses empresariales” y faciendo oyíos de mercader coles reclamaciones vecinales. “Esperamos qu’esti ‘gallardón’ ayude al señor Cascos a que sepa que nun se pue carecer de sensibilidá cola naturaleza asturiana y qu’ha de cambiar, anque por desgracia y, en vista de la so actitú y declaraciones nestos meses, hasta agora somos pocos optimistas. Esperemos que los asturianos obliguemos-y a dar esi cambiu de xestión tan necesaria”, apunten dende la Coordinadora.

Comparte...                                    

Enllaz permanente