La Farrapona y L’Angliru, llistos pa recibir a La Vuelta

El mundu de la bicicleta va poner los sos güeyos esta fin de selmana n’Asturies. La Vuelta llega al nuesu país y La Farrapona, el sábadu, y L’Angliru, el domingu, van resultar decisivos nel desenllaz de la ronda ciclista.
 
El británicu Bradley Wiggins va llegar al altu de los Llagos de Somiedu col maillot colloráu de llíder, anque la so defensa nes rampes de La Farrapona va resultar difícil al ciclista nacíu na población flamenca de Gent, yá que los seis primeros na xeneral tán a menos de 36 segundos na clasificación. Cientos d’aficionaos van a averase mañana a Somiedu pa presenciar esta llucha emocionante pol maillot colloráu, polo que les autoridaes tán trabayando pa facilitar l’accesu a toles persones que se desplacen a la zona.
 
Asina, habilitáronse dellos aparcamientos nos que poder dexar el coche y xubir el puertu a pie o en bicicleta. Una de les opciones ye la de dexar el coche en La Pola, a 17 quilómetros de la meta, o averase hasta Arbeyales o Saliencia, ésti últimu a 7 quilómetros de la cume. El tráficu para llegar a estes dos poblaciones va cortase a les 11 hores del sábadu. Otra opción ye llegar a La Farropona pola vertiente lleonesa, pudiendo aparcar a cuatro quilómetros de la cima en Torrestío.
 
La etapa con llegada en La Farrapona, decimocuarta de la ronda con 175,8 quilómetros de llargor, va tener salida d’Astorga y va pasar pel puertu Ventana, de segunda categoría, y el de San Llorienzu, de primera, pa llegar al altu de los Llagos de Somiedu, de categoría especial, a les 17.24 hores nel meyor de los horarios previstos. Mentes, el domingu, la salida va tar situada n’Avilés, con 142,2 quilómetros per delantre pa llegar a L’Angliru previu pasu pel Altu del Tenebréu (segunda categoría) y l’Altu del Cordal (primera categoría). La llegada ta prevista pa les 17.27 hores.
 
La cume asitiada nel conceyu de Riosa, considerada una de les más dures del ciclismu mundial, va concentrar a miles d’aficionaos nes sos rampes, polo que les autoridaes tienen cortaos al tráficu rodáu dende güei los accesos al altu. Van a acondicionase aparcamientos en Viapará y na Covarriella, a seis quilómetros de meta, pero nun se va poder llegar a ellos dende’l domingu a les 9 hores. L’accesu a L’Angliru tamién va tar cortáu a les bicicletes dende 14.30 hores.

Comparte...                                    

Enllaz permanente