Janna Eijer, representante frisia, llevóse’l Liet International d’Udin

La compositora Janna Eijer (Fryslân) foi la ganadora del Liet International, festival de la canción en llingües minorizaes celebráu’l sábadu n’Udin (Friûl). Skama la Rede, que participó col tema ‘Condenáu’, finalizó n’octava posición.
 
‘Ien klap’ foi’l cantar de la moza frisia qu’encantó al xuráu d’un premiu que, sin nun hai novedá, va celebrase en Xixón l’añu qu’entra. Eijer algamó 83 puntos, dos más que los representantes d’Udmurt Elkun/República d’Udmurtia –territoriu baxo alministración rusa–, Silent Woo Gore, y trés más que Coffeshock Company, banda de Burgenland que se llevó’l premiu popular del festival.
 
Skama la Rede, representante d’Asturies nel Liet International, defendió’l tema ganador del Premiu al Meyor Cantar ‘Condenáu’ –con lletra del periodista candasín David Artime–, que consiguió un octavu puestu al sumar 52 puntos. Doce foron los participantes nesta edición del festival na que tamién tuvo presente Euskadi con Siroka, grupu que terminó quintu con 70 puntos. Hasta Udin desplazóse’l direutor de Política Llingüística, Alfredo Ignacio Álvarez Menéndez, en representación del Gobiernu, y Ismael González Arias, que formó parte del xuráu. 

Comparte...                                    

Enllaz permanente