Gadafi pide asilu a Arxelia, pero nun recibe respuesta de Buteflika

El llíder libiu, Muamar el Gadafi, ta escondíu na ciudá fronteriza de Ghadames, onde solicitó asilu n’Arxelia a les autoridaes del país vecín, ensin respuesta. Güei, el militar faló per cuarta vez dende la caída de Trípoli y aseguró que nun va rendise.
 
El diariu arxelín ‘El Watan’, citando a fontes presidenciales, dio a conocer esta noticia que percorrió güei tol mundu. Según esti mediu de comunicación, Gadafi alcuéntrase nesta población libia en compañía del restu de la so familia y intenta negociar dende ellí la so entrada en territoriu arxelín, ensin atopar respuesta del presidente Abdelaziz Buteflika. “Nun ye la primer vez que Gadafi o dalgún de los sos emisarios intentó entrar en contautu con Buteflika pa tratar esti asuntu, pero la posición arxelina ye clara y neutral. Negámonos a metemos nos asuntos internos libios”, aseguró esta fonte de Presidencia.
 
Sobre'l futuru de Gadafi, les autoridaes arxelines tán “inquietes ante la posibilidá de que s'alíe con Al Qaeda nel Magreb Islámicu (AQMI) –filial del grupu terrorista Al Qaeda na rexón– como recursu últimu pa la so sobrevivencia”. Güei, el llíder libiu faló per cuarta vegada tres la caída de Trípoli en manes de los rebeldes y aseguró qu’éstos tán dividíos. Nun mensaxe faláu emitíu pola televisión siria Al Rai, Gadafi dixo que “nun nos entregaremos otra vegada. Nun somos muyeres. Continuaremos lluchando”.

Comparte...                                    

Enllaz permanente