Foro forma grupu parllamentariu con UPyD de manera provisional

Rosa Díez anunció que Foro de Ciudadanos y UPyD van formar grupu parllamentariu de manera provisional. Esta decisión, amás d’evitar el vetu posible del PP a UPyD, da vía llibre a los populares pa negar la formación de grupu propiu a Amaiur.
 
L’alcuerdu ente Enrique Álvarez Sostres y el partíu de Rosa Díez adoptóse al considerar que’l PP taba utilizando a UPyD como "coartada" pa xustificar la so negativa previsible al grupu parllamentariu d’Amaiur. El voceru del grupu popular, Alfonso Alonso, venía reiterando que nun se podía entamar la llexislatura nel Congresu incumpliendo’l reglamentu a la hora de formar grupos parllamentarios. UPyD consiguió los cincos diputaos necesarios pa la formación de grupu parllamentariu, pero nun llegó al 5 por cientu que s’esixe al rexistrar un 4,69 por cientu de los votos. N’otres ocasiones, la Mesa del Congresu yera flexible y permitía a los partíos nesta situación formar grupu, pero’l PP, con mayoría na Mesa formada recién, pretendía utilizar a UPyD pa negáselo tamién a la izquierda abertzale, que suma un 14,86 por cientu en Navarra que-yos impide crear ún al nun llegar al 15 por cientu necesariu.
 
Rosa Díez reprocha al PP que trate a UPyD de la mesma manera qu’a Amaiur, una actitú que considera "una ofensa" que "nun-yos va a salir de baldre". "Tenemos la obligación de ser trataos con respetu y lo que fixo’l PP ye una falta de respetu que nun vamos tolerar", dixo na rueda de prensa na qu’anunció l’alcuerdu con Foro pa formar grupu propiu col diputáu asturianu como “asociáu”, faciendo usu del artículu 24 del Reglamentu. Tres esta formalidá, Álvarez Sostres va volver al grupu mistu.

Comparte...                                    

Enllaz permanente