El documental ‘Eu soi quen fun’ va estrenase esti sábadu en Xixón

La tercer obra audiovisual fecha en gallego-asturiano, ‘Eu soi quen fun’, va presentase esti sábadu nel Centru de Cultura Antiguu Institutu de Xixón. Melania Fraga ye l’autora d’esti documental qu'amuesa la vitalidá del idioma.

“A película achéganos, a través da poesía d'Ana Vega, a música del grupo Cádaba, a investigación de Xosé Miguel Suárez y as entrevistas con Ramiro Pérez y Miguel Galano, al occidente asturiano, á espresividá da súa lluz, da súa llingua y da súa xente”, esplica Fraga, responsable d’esta obra qu’amesta, “col sou propio ritmo, música, poesía y as historias de ‘Mediaoreya’, tatarabolo d'Ana Vega, deixando ver a forza que ten el gallego-asturiano como apuesta en la creación artística actual”. Esti proyeutu, financiáu gracies al apoyu de la Direición Xeneral de Política Llingüística, el Conceyo d’El Franco y dellos particulares al traviés de la plataforma ‘Lánzanos’, tuvo l’asesoramientu llingüísticu de Xosé Miguel Suárez. Mentes, Alejandro Lafuente y Rebeca Velasco encargáronse de la banda sonora.

Nel estrenu d’esti sábadu nel Antiguu Institutu, que va principiar a les 20 hores, van intervenir Alfredo Ignacio Álvarez Menéndez, direutor xeneral de Política Llingüística; Cecilia Pérez, alcaldesa d’El Franco; Ana Vega; y Melania Fraga, amás d’un representante del Conceyu de Xixón, tovía por confirmar. L’eventu, con entrada llibre hasta completar aforu, inclúi tamién una actuación musical protagonizada por Lafu y Rebeca, que van interpretar el cantar compuestu a costafecha pal documental.

Comparte...                                    

Enllaz permanente