Bloque-UNA de Xixón defende’l Festival Arcu Atlánticu y critica la “hipocresía” del PSOE

Daniel Fernández, voceru de Bloque-UNA en Xixón, defendió’l Festival Arcu Atlánticu que va celebrase del 21 al 29 de xunetu y criticó la “hipocresía” del PSOE en materia cultural. Respuende asina a unes declaraciones de Villabrille contraries al certame.
 
L’edil socialista propunxo destinar les perres previstes pa la organización del Festival Arcu Atlánticu pa la merca de llibros de testu que se regalaríen a los pas con más necesidaes. Justo Vilabrille señaló que’l Conceyu de Xixón tien presupuestaos casi 300.000 euros pa un festival que, na so opinión, nun va ser referente al competir col d’An Oriant/Lorient, el d’Ortigueira o los d’Avilés, y que promociona una política cultural “de poco valor, de percorríu propiu, zarrada en sí mesma y ensin proyeición más allá de lo puramente llocal”.
 
Estos argumentos contra l’eventu impulsáu por Carlos Rubiera, conceyal de Cultura, son “demagóxicos, acomplexaos y llaraos d'autoodiu”, n’opinión de Fernández, que recordó que Vilabrille ye “d’esi partíu que xestionó los casi 50 millones d'euros de sobrecostu de la Llaboral o del que quería gastar más de tres millones d'euros nun invernaderu tropical pal Xardín Botánicu; a esi que lleva gobernando más de 30 años en Xixón ensin que gastara enxamás 300.000 euros en mercar llibros de testu a les families con más necesidaes o que lleva engañando a les families de colexu Xovellanos más de cinco año con atrasos inxustificaos, dao que tanto importa-y la enseñanza”.
 
Sobre’l Festival Arcu Atlánticu, Bloque por Asturies-Unidá Nacionalista Asturiana (UNA) de Xixón señaló que, "a falta de conocer los detalles y la concreción del mesmu, el plantegamientu inicial paez acertáu, yá que lo poco que conocemos del proyeutu aúna la potenciación de lo propio cola presencia n’Asturies de la riqueza cultural d'otres partes del mundu coles que tenemos y tuvimos una rellación evidente". “El problema del señor Vilabrille, como na mayoría de los dirixentes del PSOE, ye la so adversión a tolo que consideren que ye cultura o identidá asturiana, ante lo que sería bono que'l PSOE recuerde que l'añu pasáu subvencionó la Feria d'Abril en Xixón, ensin qu'escucháramos les crítiques del señor Vilabrille, demostrando que lo que-y fastidia ye gastar en cultura asturiana”, destacó’l voceru de la coalición, que recordó que “nun ye lo mesmo gastar en cultura qu'invertir en cultura”.
 
Nesi sen, apuntó que cuando s'invierte n'ámbitos onde Asturies “tien enforma qu'apurrir, como ye na cultura del arcu Atlánticu”, ésta pue aportar tanto dende un puntu de vista cultural como económicu, “desendolcando una industria cultural que'l PSOE lleva años arrequexando, abriendo l’asturiana a otros ámbitos y amosando n’Asturies la cultura que se fae en otros llugares del mundu”. Por últimu, Bloque-UNA solicita a los socialistes qu’abandonen “l’antiasturianismu gafientu que lleva exerciendo dende va munchos años, frutu del autoodiu y un complexu evidente, y qu’entamen a decatase qu'invertir en cultura, si se fai con sentíu y dientro d'un programa d'actuación, ye claramente xeneradora d'empléu y riqueza pal nuesu país”.

Comparte...                                    

Enllaz permanente