"Se nos escuchará si otru criminal de guerra visita la Universidá"

La Coordinadora d'Asamblees d'Estudiantes de la Universidá, dixo que se-y volverá "escuchar" si "ésti o cualquier otru criminal de guerra visita Uviéu", en referencia a Aznar.

Los organizadores de la protesta contra la charra de José María Aznar na Facultá d'Económiques, dixeron que van tenelos qu'escuchar mil veces, si ye necesario". Amás, el coleutivu afirmó que "nun tien nada qu'esconder", polo que señaló que "nun fai falta nenguna investigación", como espresó'l ministru d'Educación, Ángel Gabilondo.
  
Al traviés d'un comunicáu, la Coordinadora respondía a les palabres del responsable Estatal, qu'ayeri vio "procedente" que s'investigara la protesta contra Aznar na Universidá d'Uviéu, amás d'otra que se realizó na Universidá Autónoma de Barcelona contra un actu de la diputada d'Unión Progreso y Democracia, Rosa Díez.
  
Asina, recordaron que "la Universidá d'Uviéu tien un compromisu cola paz establecíu nos estatutos de la mesma". "Poro, los criminales de guerra nun tienen de participar nella. Y si esti mesmu señor, o algún otru criminal de guerra vien a Uviéu, va tenenos qu'escuchar una...y mil veces, si ye necesario", añadieron.
  
Afirmaron tamién que "la Coordinadora d'Asamblees reivindicó l'actu al otru día". "Salimos na prensa con nomes y apellíos. Nun fai falta nenguna investigación pa saber quién somos, porque nós nun tenemos nada qu'esconder, nin nada de lo qu'avergoñamos", señala'l comunicáu.
  
Esplicaron tamién que'l coleutivu, "funciona de manera asamblearia. Nun hai nin líderes, nin lideraos, nin cabezaleros. Polo tanto difícilmente pue identificase a los sos cabezaleros porque éstos nun esisten".
  
A lo último, la nota afirma que s'actuó "de manera pacífica". "La violencia punxéronla los siguidores d'Aznar y la seguridá personal del mesmu, amás de los guardies xuraos universitarios", acaba'l comunicáu
 

Comparte...                                    

Enllaz permanente