El Principáu aparca la capitalidá cultural "por culpa de De Lorenzo"

El viceconseyeru de Promoción Cultural y Llingüística, Jorge Fernández León, dixo que'l Principáu nun va siguir trabayando nun proyeutu de capitalidá cultural europea "que nun esiste".

Según señaló Fernández León, que lleó una declaración al respective na Conseyería, la decisión tomóse en falando colos representantes de los conceyos de Xixón y Avilés que veníen trabayando nel proyeutu. "Creemos que nun se dan nenguna de les condiciones pa siguir col nuesu papel de coordinación", dixo. Los motivos son la "tomadura de pelo" del Alcalde d'Uviéu, Gabino de Lorenzo (PP), que güei anunció nel diariu 'La Nueva España' qu'aparta del proyeutu al conceyal de Cultura, José Suárez Arias-Cachero.

A xuiciu de Fernández León, l'alcalde d'Uviéu ta dedicándose a "dinamitar" el proyeutu y fai imposible que siga alantre. Consideró que "nun ye de recibu que'l Principáu, que vien coordinando tolo relativo a la candidatura, vaya enterándose pela prensa de determinaes decisiones".
  
El viceconseyeru dixo que l'alcalde, coles sos decisiones, ta "renunciando" al proyeutu entamáu conxuntamente. "La voluntá del Conceyu d'Uviéu ye la d'abandonar too aquello polo que veníamos trabayando dende hai munchu tiempu", llamentó'l dirixente de la Conseyería, qu'acusó a De Lorenzo de "apartar" del procesu al Principáu y a los conceyos de Xixón y Avilés.
  
Consideró que l'actitú de De Lorenzo acabó coles aspiraciones culturales de miles d'asturianos. "Tienen que saber qu'esto pasó pela ocurrencia de De Lorenzo pa facer imposible la candidatura", señaló. Jorge Fernández León llamentó que De Lorenzo tirare "pela borda" la meyor oportunidá cultural d'Uviéu na so historia reciente, puesto que diba ser la ciudá que lideraría la candidatura. "Despreció'l trabayu fechu en favor d'un acuerdu cultural ente les tres ciudaes y el Principáu que sería la verdadera palanca pa meyorar la vida cultural de la so propia ciudá", repostió.
  
Sicasí, Fernández León dixo que tol trabayu realizáu hasta la fecha polos distintos equipos técnicos nel proyectu van aprovechalu, porque yá ta dando "frutos" con iniciatives conxuntes como la Nueche Blanca.
  
"El Gobiernu del Principáu caltién tolos sos compromisos en materia de proyeutos culturales na capital, a pesar del despreciu de Gabino de Lorenzo", señaló Fernández León, que consideró que'l primer conceyal uvieín, al que calificó de verdugu del proyeutu, va refuxase nuna bandera de "victimismu".
  
Preguntáu sobre cuála sería la postura del Gobiernu si a lo último Uviéu decidiera presentar la so propia candidatura, Fernández León respondió que si eso llega a realizase'l Principáu daría la so opinión.
  
Tamién consideró que sería un error qu'otres ciudaes como Xixón o Avilés presentaren la so propia candidatura, porque eso ye algo que nun se realiza "por competencia" ente ciudaes onde la so vida cultural ye complementaria.
  
A lo último, Fernández León llamentó la imaxe que se ta treslladando fuera d'Asturies en rellación con esti asuntu, dalgo de lo que responsabilizó al alcalde d'Uviéu "pola so falta de visión y compromisu". El viceconseyeru refirióse a un informe de la Universidá de Valladolid que señala que los beneficios pa Salamanca cuando foi capital cultural nel 2002 fueron de más de 50 millones d'euros. "Y nun foi de la que tuvo meyores resultaos", repostió. El plazu pa presentar candidatures de forma oficial pal 2016 acaba'l 12 de xunetu.
  
La candidatura conxunta d'Uviéu, Xixón y Avilés siguía siendo güei la más votada polos internautes, con un porcentaxe del 15,71%, na páxina web de l'Asociación de Ciudades Candidatas a la Capitalidad Europea de la Cultura. Sicasí, Fernández León dixo güei qu'esa nun ye una páxina oficial, sinón que ta xestionada por una asociación privada.
 

Comparte...                                    

Enllaz permanente