Migoya: “El Principáu siempre almitió los escritos n’asturianu”

Ana R. Migoya dixo que’l Principáu siempre almitió los escritos n’asturianu. Mientres que Xunta pola y Suatea esixen la oficialidá como únicu instrumentu que garantiza drechos.

Según la Vocera del Gobiernu y Conseyera d’Alministraciones Públiques, Ana Rosa Migoya, el Principáu siempre almitió los escritos n’asturianu de los ciudadanos nes sos rellaciones cola Alministración. Asina s'espresó tres ser entrugada polos periodistes pol autu del Constitucional, nuna rueda de prensa posterior al Conseyu de Gobiernu celebráu en Morcín.
 
Migoya quixo recordar que’l Constitucional nun dio una sentencia, “sinón un autu que llinda la constitucionalidá de la nuesa Llei nel artículu qu’afita que cualesquier ciudadanu pue dirixise a l’alministración en bable o asturianu”.
 
La Vocera del Gobiernu dixo que’l Constitucional determinó como constitucional esi preceptu “y evidentemente normalidá dafechu por parte de l’Alministración asturiana”. Una normalidá que según la Conseyera yá yera un vezu, “siempre s’almitieron los escritos presentaos en bable o asturianu”.
 
Con too, Migoya quixo esclariar que l’autu del Constitucional llindase a que los ciudadanos puean dirixise a l’alministración na llingua propia del país, “y non a otres cuestiones”.
 
Oficialidá; únicu instrumentu que garantiza drechos
 
La Xunta pola Defensa de la Llingua Asturiana considera positiva la sentencia del Tribunal Constitucional y quier felicitar por ella al Aconceyamientu de Xuristes pol Asturianu “que tuvieron que sufrir en carne propio l'arbitrariedá de l'Alministración asturiana”.
 
“Consideramos significativo que'l Plenu d'esi tribunal, con un autu inapelable, quiera poner fin a la dexadez y los determinos arbitrarios de les autoridaes asturianes na aplicación de les lleis que protexen los drechos fundamentales de los falantes d'asturianu”, apunten dende l’asociación.
 
Con too, la Xunta espera qu'esta decisión seya'l primer pasu pa la igualdá xurídica ente la ciudadanía “porque de momentu nun ta reconocida más que la posibilidá de dirixise n'asturianu a l'Alministración”. Poro, apunten que pa garantizar dafechu tolos drechos llingüísticos, l'ordenamientu xurídicu del Estáu yá conoz una fórmula que funciona n'otres comunidaes: “la declaración d'oficialidá”.
 
Per otru llau, el sindicatu educativu Suatea diz que présta-yos enforma que’l Tribunal Constitucional encontara la constitucionalidá de la Llei d’Usu y promoción del Asturianu de 1998, “al suponer esta sentencia una confirmación y afitamientu del camín andáu nel reconocimientu de los drechos fundamentales de la ciudadanía asturiana que nosotros incansablemente reivindicamos”.
 
Sicasí, dende Suatea recuerden que la sentencia esclaria que podemos diriximos a l’alministración n’asturianu, pero nosotros nun podemos elixir la llingua na qu’ella tramite los nuestros espedientes y nos conteste, “que será’l castellán, pues ye la única llingua que ye oficial n’Asturies”.
 
El sindicatu diz qu’esto ye chocante y contradiz los principios básicos de la comunicación, cortesía y civismu, el dirixise a un interlocutor nuna llingua y qu’ésti te conteste n’otra, “y más cuando esi interlocutor, l’alministración, tien por función el serviciu a la ciudadanía”.
 
Dende Suatea camienten que Llei d’Usu nun garantiza’l respetu de los drechos llingüísticos de la ciudadanía n’otros ámbitos distintos a l’alministración como los ayuntamientos, la universidá, la educación o los medios de comunicación. “Ye por eso, polo que Suatea, vien demandando como únicu instrumentu afayadizu pa garantizar los nuestros derechos llingüísticos en tolos ámbitos sociales la oficialidá de la llingua asturiana y el gallego-asturiano nel so territoriu”, apunten pa finar.

Comparte...                                    

Enllaz permanente