Espublícense les actes del II Conceyu Internacional de Lliteratura

Les actes del II Conceyu Internacional de Lliteratura Asturiana de l'Academia de la LLingua yá tán nes llibreríes. El congresu,  estudió’l pasáu, presente y futuru de la lliteratura del país.

El coordinador del volume, l’académicu Miguel Ramos Corrada, esclaria nel entamu del llibru que les ponencies recoyíes “van contribuyir al enanchamientu d’un corpus teóricu que favorecerá un mayor afondamientu na conocencia de la mesma”. El Conceyu Internacional de Lliteratura celébrase cada seis años, porque “el sexeniu vien siendo la midida afayadiza pa valorar lo que se fixo ente dos feches, si se progresó o non del trabayu, na investigación o na formación”, señala Corrada. Les actes revoyíes nesti volume son les del caberu, celebráu en payares de 2007.
 
A lo llargo de les actes, podemos ver ponencies que falen sobre música; “L’orbayu nos llabios, notes sobre la canción d’autor asturiana” de Marcela Romano, “Unes notes al musical asturianu; lo que pudo ser” de Dolfo Camilo Díaz, o nel terrén más tradicional, “L’asturianu na música de tradición oral” d’Ambás, o un estudiu sobre la recopilación de la música tradicional a entamos del sieglu XX que fai José Antonio Gómez Rodríguez.
 
Tamién salió’l congresu de les llendes alministratives del país p’analizar la poesía lleonesa n’asturianu, de la mano de Nicolás Bartolomé Pérez, o la obra de Baltazar Diaz na Tierra de Miranda, a cargu d’António Bárbolo. Amás, hai ponencies onde s’estudia la lliteratura de la emigración en Cuba y en Buenos Aires.
 
Mientres que Pablo Rodríguez Medina fai un análisis del “mapa de Sodoma”, falando de la homosexualidá na nuesa lliteratura, Helena Trexo estudia’l papel de la muyer na llabor de tornar, mientres que la filóloga Laura Marcos repasa la “identidá y memoria na narrativa de Xandru Fernández” y Marta Mori analiza los nuevos modelos narrativos na lliteratura asturiana d’anguaño.
 
Ensin dexar de llau’l cómic n’asturianu, l’agua na poesía eonaviega, los símbolos d’Asturies na lliteratura de la emigración, la lliteratura xuvenil nes clases d’asturianu… Una bona riestra de temes pa conocer más fondamente la nuesa lliteratura.

Comparte...                                    

Enllaz permanente