Ebro Puleva refuga la ufierta de Capsa por considerala insuficiente

Ebro Puleva refugó la ufierta presentada por Corporación Alimentaria Peñasanta (Capsa) pa mercar la so división llechera, al considerala insuficiente económicamente.

Capsa recibió una comunicación del grupu alimentariu na que s'indica que la so ufierta preliminar refugóse por criterios económicos. Anque les citaes fontes nun detallen l'importe plantegáu, podría asitiase perbaxo los 500 millones d'euros en que, según fontes del mercáu, taría valoráu esti negociu.
  
El fabricante de Central Llechera Asturiana presentó la so ufierta col apoyu d'un 'pool' d'entidaes financieres, integráu por siete bancos y caxes d'aforros, dispuestu a financiar la operación.
  
En refugando esta ufierta, podríen quedar como finalistes nuna eventual operación de venta de Puleva Food el grupu Lleche Pascual n'alianza cola firma francesa de capital riesgu PAI Partners, propietaria del 50% de Yoplait, y otres multinacionales como la francesa Lactalis o la holandesa Friesland Campina.
  
Fontes del sector indicaron a Europa Press que'l grupu holandés interesóse pola división llechera del primer grupu alimentariu español, anque que nun detallaron si presentó ufierta de compra o tien previsto facelo.
 
Arla foods descuélgase
  
Otru de los nomes que s'embaraxaron fueron el del grupu italianu Parmalat, que evitó facer comentarios al respecto, y el danés Arla Foods, qu'asegura que nun tien planes para mercar nengún negociu lácteo n'España nin interés na compra d'activos a Ebro Puleva.
  
"Tenemos negocios nel mercáu español, pero la nuesa estratexa nun pasa nesti momentu per compres n'España", dixo a Europa Press un voceru de la compañía.
  
Ebro Puleva encargó al bancu d'inversión JP Morgan asesoramientu na posible venta del so negociu llecheru, tres presentase delles ufiertes interesaes na compra del mesmu.
  
Na presentación de los sos resultaos de 2009 el pasáu vienres, Ebro Puleva sorrayó que ta analizando les opciones de futuru de la división llechera dientro del grupu. "Cualquier decisión va tomase teniendo en cuenta lo meyor a llargu plazu pa los nuesos aicionistes y pal mesmu negociu, garantizó la multinacional española", que sorrayó que nun tien necesidá de vender.
  
Esti negociu alzó un 33,8% el so resultáu brutu d'esplotación (Ebitda) el pasáu exerciciu, hasta 67 millones d'euros, en cuantes que la so cifra de negociu asitióse en 444 millones, un 12% menos.

Comparte...                                    

Enllaz permanente