Asturies ye’l llugar del mundu más densu y ricu en bolos, con 36 xuegos

De toles cultures investigaes, l'asturiana ye la que tien más xuegos de bolos, pero un gran porcentaxe ta en desaniciu. Asina lo indica l’Atles de los Bolos Asturianos de Carlos Suari.

L’Atles presentábase nel branu como una investigación que quería afondar nos raigaños culturales de los xuegos de bolos n’Asturies, investigando mientres diez meses l’etnógrafu especializáu nel patrimoniu lúdico-motor, Carlos Suari, el mundu del bolu nel Noroeste Peninsular y nel marcu européu.
 
L’investigador alcontró 36 tipos de xuegos de bolos, diferenciando los tradicionales y los modernos o sintéticos, “aquellos que nes últimes décades sintetizaron les característiques de los primeros pa conformar xuegos modernos, davezu institucionalizaos”.
 
Con tolos datos recoyíos, Carlos Suari afirma qu’Asturies ye un casu d'esceicional variedá, intensidá y trescendencia social. Topándose nel nuesu país ocho xuegos modernos de bolos, de los que seis tán federaos anguaño y ún ta desapaecíu. “Sicasí, esi porcentaxe de desaniciu ye mui superior nos xuegos tradicionales, tolos que se conserven anguaño presenten graves problemes de viabilidá, fundamentalmente pol avieyamientu de los prauticantes y pola perda poblacional de los llugares onde se xuega”, señala Carlos Suari.
 
Esisten n’Asturies cuatro families de xuegos de bolos; a valtar, a valtar y aventar, a aventar, y a valtar y facer trayectories cola bola, “formando los tres últimos, bloques incompatibles, que nun comparten territoriu, y a valtar un grupu discontinuu, que posiblemente formaba enantes un continuu”, apunta Carlos Suari.
 
L’etnógrafu fala d'una secuencia xeográfica d'estos xuegos, con predominiu del rasgu “a aventar”, que ta una macrorrexón que va, pela llinia de costa, dende l'Atlánticu gallego-portugués hasta Carreño. Mientres que’l rasgu “facer trayectories cola bola”, predomina n’otra macrorrexón que pel llitoral va dende Xixón hasta dalgunos quilómetros al Este de Santander.
 
Anguaño, ta preparándose un material divulgativu pal que ta buscándose forma y fontes de financiación en collaboración con Suburbia Ediciones. El llibru constará de tres partes, un ensayu, una guía de tolos xuegos de bolos asturianos y un miniatles coles considerances etnoxeográfiques más interesantes.

Comparte...                                    

Enllaz permanente