Sotware llibre, l'únicu camín pa l'asturianu nes nueves tecnoloxíes

Les conclusiones de la Tertulia Pachín de Melás sobre software llibre n'Asturies, foron que la educación tien qu’adoptar el sistema llibre, nos negocios hai que convivir col privativu, mientres que pa la llingua, el llibre ye l’únicu camín.

La tertulia, una iniciativa mensual d'UNA-Xixón celebrada na xixonesa cervecería Austera, cuntó cola participación de de Xabel García Pañeda, profesor del Departamentu d'Informática de la Universidá d'Uviéu y autor del llibru "Dos versiones asturianes de les nueves tecnoloxíes" d'Araz Llibros; Xandru Armesto, maestru y miembru del colectivu "Softastur. Software llibre n'asturianu"; y Daniel Vicente y Arsenio Coto, desendolcadores del traductor castellán-asturianu "Eslema".
 
Una de les principales conclusiones, foi que pa una llingua minoritaria como l’asturianu, ensin puxu dende l’alministración, ye fundamental el software llibre, “ye l’únicu que permite’l so usu yá que’l Principáu nun va pagar un millón d’euros pola torna de Microsoft”, apuntaron.
 
Xandru Armesto comentó como nos colexos enséñase a usar Windows, cuando namás se pue usar en castellán y pa poder usalu n’inglés habría que volver a pagalu de nuevu. “Si usaren software llibre valdría pa les clases de castellán, d’inglés y d’asturianu”, señaló.
 
Amás, dende los asistentes apuntaron como tener programes informáticos n’asturianu ye fundamental pa la normalización social del idioma ente la mocedá, “va ayudar muncho más que la lliteratura”.
 
Poli Mencía, moderador de la charra, dixo que proyeutos como l’Eslema, empobinaos pola alministración, foron desendolcaos al traviés de software llibre, “xenerando texíu n’Asturies, cuatro persones trabayando nel proyeutu y xenerando un conocimientu que quedó equí, mientres que si fora con privativu, sería una multinacional que finaría’l proyeutu y nun tendría aportao nada a la comunidá”.
 
Pero pa Xabel García Pañeda, el software llibre ye más primitivu, “l’Alministración que lu contrata va xenerar más emplegu, pero va costa-y más”. Del mesmu mou, apuntó que cuando los gobiernos paguen el desendolque de proyeutos, el software llibre avanza, “los informáticos tienen que comer tamién”.
 
Sicasí, Xandru Armesto señaló que si l’Alministración desendolca un proyeutu con software privativu, el ciudadanu tendrá que pagar por usar esi serviciu, “cuando yá punxo perres de los sos impuestos pa desendolcar esa ferramienta”.
 
García Pañeda esclarió que’l software llibre val pa coses pequeñes, “pal negociu lo meyor ye’l privativu, pa la cultura y el conocimientu, sobre too pa una cultura minoritaria, ye meyor el llibre”. Apuntando que los dos tien que convivir pa da-y el meyor serviciu al ciudadanu, “pa que la sociedá avance”. Pero tamién tienen que convivir pa consiguir el meyor negociu y “que l’informáticu puea medrar”.
 
Na tertulia falóse de que’l futuru del software llibre ta en que les grandes empreses faigan usu d’él. Sicasí, anguaño la xente nun tien vezu d’usar software llibre, “estráñense al prender l’ordenador y nun ver Windows, sobre too les grandes empreses, que son les más conservadores nesi sen”, apuntó ún de los asistentes que se dedica a comercializar programes informáticos.
 
Xandru Armesto dixo que cada modelu de software producía un modelu social. Asina, el privativu ye d’él que lu fai, “nun se pue compartir, mientres que’l software llibre ye daqué que se fai en comunidá y pa la comunidá”.
 
Anque como s’apuntó nel alderique, a la fin l’usuariu ye quien tien la última pallabra, pue decantase pol software llibre o, mesmamente, piratear el privativu d’una gran compañía.

Comparte...                                    

Enllaz permanente