1996, un añu fundacional pa la llingua na rede

Febreru 18, 2010 por D. Barreiro

Esti sábadu, la Casa de los Alberti de Ciañu acueye’l II Sidra&Blogues, onde David Guardado va ufrir la charra “1996”, que va facer un repás pela historia de la llingua na rede.

Nella, va plantegar l’añu 1996 como fundacional na presencia de la llingua asturiana na rede y la so rellación col desarrollu d'internet n'Asturies. Según señala l’espertu n’internet, direutor de la Zona Atlántica Prensa Ibérica Dixital, y cofundador d’Asturies.com, “nun foi’l primer añu nel que se fixeron coses, pero sí nel que tolo que venía trabayándose dende 1994 españó nuna confluyencia de proyeutos y d'esfuercios de persones que punxeron la llingua asturiana nel mapa de la vanguardia tecnolóxica y del conocimientu, lo que valió daquella pa camudar delles mentalidaes en dalgunos sectores sociales”..

Según l’espertu n’internet, la idea de la charra ye amosar cómo les persones interesaes na normalización de la llingua asturiana vieron na rede un preséu importante pa da-y prestixu y visibilidá al idioma. “Delles persones pioneres de la rede n'Asturies, que pueden considerase auténticos "pás fundadores" de la rede nel país y que taben venceyaes a la Universidá d'Uviéu, apostaron de forma natural y comprometida pola presencia de la llingua asturiana”, señala.

Como ún de los finxos d'esti procesu va comentar la xénesis y puesta en funcionamientu del grupu de Usenet "soc.culture.asturies", una especie de grupu de noticies o antecedentes de los foros. Soc.culture.asturies creóse pa falar de sociedá y cultura d'Asturies, “amás de que tenía'l nome del país n'asturianu, pertenecía a una xerarquía de país”, apunta David Guardado.

Naquel 1996, esistía un grupu español y otru catalán, “los vascos y los gallegos inda nun teníen ún, lo que fixo muncho pola visibilidá d'Asturies y de la llingua asturiana ente la xente que daquella se movía pela rede”. Anguaño, los Usenet foron compraos por Google, “pero nos 90 yeren el sitiu nel que se falaba y discutía de cualquier tema”. Estos grupos taben organizaos temáticamente y nun los podía crear cualquier, “pa dar d'alta un grupu teníes qu'incluyilu nuna xerarquía temática y había un procesu de discusión y votación ente tolos usuarios pa decidir si tenía sentíu crealu o non”, comenta Guardado.

El Centru de Referencia de la Cultura y la Llingua Asturiana Casa de los Alberti de Ciañu va acoyer esti sábadu, 20 de febreru, el II Sidra&Blogues. Nel trescursu l’actu van ponese delles charres sobre internet y el desarrollu de redes sociales n’asturianu amás de facese entrega de los premios al Meyor Blogue n’asturianu del añu 2009, l’actu rematará con alderiques sobre’l tema alredor d’unes botellines de sidra pelos chigres de Ciañu. El II Sidra&Blogues entámalu la Xunta de Blogues en llingua asturiana y collaboren nél l’Ayuntamientu de Llangréu, Softastur y Xareos.

Comparte...