El segundu Sidra&Blogues yá tien zarráu'l so programa

La entrega del Premiu Meyor Blogue, charres sobre la comunidá o la historia del asturianu na rede, conformen los actos del Sidra&Blogues del próximu 20 de febreru.

L’actu entamará a les 17.00 hores na Casa de los Alberti de Ciañu (Llangréu), cola conferencia “1996”, onde l’espertu n’Internet, direutor de la zona atlántica de Prensa Ibérica Dixital y cofundador d’Asturies.com, David Guardado, va falar d’esi añu como fundacional pa la llingua asturiana na rede, faciendo un repás de toles iniciatives y coses que pasaron y falando de xente concreto.

Depués, l’espertu en redes sociales y diseñador de la campaña “Doi la Cara”, Poli Mencía, entamará una charra nomada “comunidá”, onde va falar d’esi conceutu adaptáu a la bloguesfera asturiana y la interrellación ente los usuarios.

Pa finar coles charres, el miembru de Softastur Marquinos, falará de “escoyeta de plataforma”, onde va facer un repás poles plataformes más utilizaes polos usuarios pa facer blogues, esplicando pros y contras, la forma d'entamar un blogue y les diferencies qu'hai ente elles.
 
Pa pesllar el II Sidra&Blogues llegará la entrega de premios al Meyor Blogue n’Asturianu 2009 qu’esti añu recayó na páxina “El Xanu’l Caborniu", siendo merecedor tamién del premiu al meyor diseñu.
 
Dende la organización quieren convidar a tolos blogueros y tola xente en xeneral a averase a la Casa de los Alberti, el próximu sábadu 20 de febreru. Del mesmu mou, encamentar a tolos blogueros a confirmar la so asistencia al traviés del blogue TrayasgayA.
 
“Viendo l’acoyida que tuvieron les votaciones somos optimistes de cara a l’asistencia de xente y yá hai dellos blogueros que nos confirmaron la so asistencia”, señala Tin Seoane, ún de los organizadores.

Comparte...                                    

Enllaz permanente