Consuelo Vega presenta los nominaos al Premiu al Meyor Cantar

“Chueve” de Brandal, “El dinamiteru” de Dixebra, “El mio sitiu” de Lafu&Rebeca, “La casa’l mieu” de Misiva y “Tierra” de Xera son los cinco finalistes pal Premiu al Meyor Cantar 2010.

La Direutora Xeneral de Política Llingüística, Consuelo Vega, presentó güei a los cinco grupos nominaos, nuna rueda de prensa celebrada na Casa de Cultura Teodoro Cuesta de Mieres, onde’l 20 de febreru va celebrase tamién la gala onde se sabrá’l finalista.

Esti premiu ñació en 2007 y, según Consuelo Vega, “quier reconocer y sofitar dende’l Gobiernu d’Asturies la llabor inmensa de creación que tán desarrollando los nuestros músicos”. Amás, señaló los tiempos difíciles que ta atravesando’l mercáu musical, “más pa la nuestra música a la que-y cuesta trabayu facese un furaquín”.
 
Sicasí, Vega dixo que la música asturiana taba nun bon momentu y que, poro, “tamos arguyosos d’ella”. Comentó tamién el gran númberu de cantares presentaos pal galardón; 106 temes orixinales interpretaos por 21 grupos.
 
No que cinca a los nominaos, podemos ver grupos qu’espublizaron el so primer discu l’añu pasáu, como Brandal y Misiva, o formaciones con llarga trayeutoria, como Dixebra, Xera y Lafu&Rebeca.
 
Mientres que los cantares van dende’l folk melódicu de  “Chueve” de Brandal, el punk-rock de “El dinamiteru” de Dixebra y “La casa’l mieu” de Misiva, el folk-electrónicu de “Tierra” de Xera y la canción d’autor de “El mio sitiu” de Lafu&Rebeca.
 
El resultáu final sabráse’l sábadu día 20 de febreru, Día Internacional de la Llingua Materna, a les 19.00 hores, nuna gala presentada polos periodistes Vanessa Gutiérrez y Naciu Varillas que tresmitirá en direuto la TPA. L’espectáculu zarraráse cola actuación d’Alfredo Gonzaléz, ganador de l’anterior edición.
 
Pa sofitar l’eventu, la Direición Xeneral de Política Llingüística abrió una web onde se pue ver tola información d’ésta y les ediciones anteriores del Premiu al Meyor Cantar, que va ufrir noticies, fotografíes ya información de los finalistes. Amás de poder sentir los temes que compiten na gala.
 
El ganador llevará como premiu la escultura de María Xesús Rodríguez, “La Payarina”, amás del apoyu de la Conseyería al traviés d’actuaciones y la representación del nuesu idioma nel festival Liet International. Esti festival, que cuenta col apoyu del Conseyu d’Europa, va facese esti añu n’Inverness, la capital de les Highlands escoceses.

Comparte...                                    

Enllaz permanente