Juan Pablo salva al Sporting de perder énte’l Xerez

Juan Pablo evitó’l desastre en Chapín y fixo que’l Sporting lleve yá seis selmanes ensin perder. L’equipu xixonés dominó nel primer tiempu, estrellando dos balones nos postes, pero’l Xerez lluchó enforma na segunda parte, faciendo méritos pa una victoria que Juan Pablo evitó con grandes paraes. Keita foi’l que más fixo por marcar gol per parte del Xerez. L’equipu xixonés sumó un puntu que xunto’l restu de resultaos de la xornada permiten que’l Sporting quede na séptima plaza.

 El primer tiempu foi domináu pol equipu xixonés. Nel minutu cuatro, tres un saque de falta, un centru d’Armenteros foi a Keita y el so remate foi salváu cola mano por Juan Pablo, dos minutos depués el sportingista José Ángel llanzó un llibre indireutu y l’esféricu estrellóse nel palu esquierdu de la portería de Renan, evitando'l 0-1. Armenteros llanzó otru saque d’esquina que foi aprobecháu por Keita, pero Juan Pablo volvió actuar. Los de Preciado tuvieron dos oportunidaes más con De las Cuevas nel minutu 16, rematando dende la frontal del área cuando’l balón estrellóse nel poste pola acción de Renan, y nel 41, con un disparu dende la frontal que marchó rozando’l poste.
 
El segundu tiempu tuvo marcáu pola llucha del Xerez, que fixo méritos pa una victoria. Cuatro en total foron les ocasiones pal Xerez. Nel minutu 53, tres un saque d’esquina, Antoñito unvió’l balón al poste con un cabezazu escoráu y nel minutu 60, Francis culminó una gran internada con un centro-chut que salió llixeramente altu. Cinco minutos más tarde una chilena de Keita foi salvada por Juan Pablo. La última oportunidá foi nel minutu 71 col central David Prieto, con un remate dientro del área que topó de nuevu con Juan Pablo.
 

Ficha téunica:
 
Xerez: Renan, Bergantiños (Viqueira, m. 75), Francis, Antoñito (Maldonado, m. 86), Mario Bermejo, Orellana, Armenteros (Momo m. 63), David Prieto, Casado, Aythami, Keita.
 
Sporting: Juan Pablo, José Ángel, Rivera, Carmelo (Diego Camacho, m. 77), Bilic (Barral, m. 72), Maldonado (Luis Morán, m. 70), Lora, Gregory, Gerard, De las Cuevas y Matabuena.
 
Árbitru: Mateu Lahoz, qu'amonestó a los locales David Prieto y Aythami y a los visitantes Matabuena y Gregory.

Comparte...                                    

Enllaz permanente