Llamazares fai reclamaciones a Madrid sobre l'Autovía del Cantábricu

Agostu 30, 2010 por E.P. / Redacción

El diputáu estatal d'Izquierda Xunía (IX), Gaspar Llamazares, reclamó al Gobiernu Central una inversión "real" na Autovía del Cantábricu, y que se recuperen los calendarios previamente establecíos.

   En declaraciones a los medios na so visita a les obres l'Autovía al so pasu per Occidente, Llamazares refirióse asina a los axustes en materia d'infraestructures propuestos pol Gobiernu. Tuvo acompañáu del coordinador xeneral d'IX d'Asturies, Jesús Iglesias.

   Nesti sen, el diputáu d'IX, dixo que l'Autovía ye  una de les infraestructures "condenaes" por parte del Gobiernu, y caltuvo que l'Executivu debe "entainar la obra como un exe vertebrador nel norte d'España".

   "Ye urxente por razones territoriales, económiques y sociales", continuó Llamazares, y por ello comprometióse a "presionar" al Gobiernu pa que "el fondu de 700 millones d'euros seya daqué más qu'un fondu de calter electoral".

   Pel so llau, Iglesias consideró qu'esos 700 millones "nun son bastantes" pa que les 57 obres d'infraestructures paralizaes recuperen el ritmu d'execución.

   Asina, recordó que'l presidente del Gobiernu, José Luis Rodríguez Zapatero, comprometió 120 millones (de los 700) con Andalucía. "Los asturianos somos del mesmu nivel y esiximos un tratamientu paecíu", dixo Iglesias, qu'esixó que se llanten los plazos y les cantidaes que se destinarán al Principáu. Esto, siguió, "dará la midida real del compromisu del Gobiernu con Asturies".

INUNDACIONES

   Pela cueta, y entrugando pola situación del corte la nacional 634 en El Bao, producíu pol mor de les lluvies torrenciales de xunetu, Llamazares calificólo de "inesplicable".

Según Llamazares, el Gobiernu tien que meyorar esa comunicación y reparala "de sutrucu". Nesi sen, esplicó que-ylo propondrá al Executivu, a base d'iniciatives, al entamu del periodu de sesiones.

Comparte...