Ecoloxistes señalen irregularidades nes obres del puertu de Xixón

Agostu 28, 2010 por E.P. / Redacción

Ecoloxistes n’Acción denuncia que’l usu d’escombreres de Mina La Camocha pa l’ampliación del puertu de Xixón incumple "les condiciones recoyíes nel proyectu presentáu pa l’aprobación de la so Declaración d’Impactu Ambiental”.

Según informó la organización, l’usu de les escombreres de la Mina La Camocha pa les obres de rellenu de l’ampliación del puertu de Xixón, foi una de les alternatives presentaes nel proyectu d’ampliación de la infraestructura. Sicasí, el promotor rechazóla y defendió el facer escavaciones na bahía de Xixón.

“Tresportar con camiones per dos posibles percorríos atravesando barrios bastante poblaos, puede xenerar daños nun deseaos por accidentes, ruíu, vibraciones, polvu y torgues pa col tráficu”, foi l’argumentación aceptada pol promotor que’l Ministeriu de Mediu Ambiente planteó en 2005 pa refugar l’usu de les escombreres de la Mina La Camocha.

Per embargu, l’Autoridá Portuaria de Xixón ta usando anguaño les escombreres mineres, polo qu’Ecoloxistes n’Acción d’Asturies denuncien qu’esti ente “incumple les condiciones ambientales, les mesmes qu’utilizó pa xustificar la escavación de bancos d’arena, y que fueron rechazaes en proyectu presentáu pa l’aprobación de la so Declaración d’Impactu Ambiental”.

Comparte...