UNA insta a l'Alministración a emplegar el software llibre

UNA vien de felicitar a la comunidá d’Ubuntu-ast por algamar el carácter d’oficial. Al empar, la organización nacionalista llama a l’alministración asturiana a usar software llibre “como midida d’aforru” y “sofitu a una industria emerxente” dientro de les TIC.

El pasáu 17 d’agostu l’equipu Ubuntu-ast algamó’l carácter de comunidá Ubuntu oficial. Con esti fechu, la llingua asturiana ye la tercera en ser oficial nesti sistema de software llibre, tres de la castellana y la catalana.

Faustino Zapico, portavoz d’Unidá Nacionalista Asturiana, felicitó a la comunidá d’Ubuntu n’asturianu por esti fechu, amás de defender "la potencialidá” del asturianu “como erbía de futuru”. “Demuestra bien a les clares que la sociedá asturiana quier entrar nel sieglu XXI cola so llingua al nivel de cualquier otru idioma”, señaló Zapico.

Xunto a les felicitaciones vinieron tamién les reivindicaciones; los nacionalistes instaron a toles alministraciones asturianes a usar software llibre. “Ello supón una importante midida d'aforru frente al costu de tener que pagar llicencies de carácter priváu”, argumenten, a la par que defienden qu’esta industria ye emerxente y “que xenera puestos de trabayu estables d'altu valor amestáu”

Crítiques al gobiernu asturianu
“El gobiernu asturianu ta a años lluz de la sociedá asturiana”, criticó Faustino Zapico, defendiendo que la nuesa sociedá “apuesta por una economía productiva a nivel internacional y non pola subvención pola subvención”.

Calificó tamién de “decepcionante” que los mayores éxitos na normalización llingüística lleguen “ensin el mínimu encontu de les instituciones” y sentenció que’l “sucursalismu” de la política económica del gobiernu asturianu “ye una muestra más del fin d'esti ciclu políticu protagonizáu por PSOE ya IU”.

Comparte...                                    

Enllaz permanente