David Artime presenta 'La bufanda' esti vienres en Xixón

L'escritor candasín David Artime presenta esti vienres la novela “La Bufanda” dientro del marcu del Salón del Llibru. Na carpa del Náuticu de Xixón a les 19 hores va presentase esta obra, ganadora del premiu de narrativa 2009 de la editorial Trabe.
 

Al traviés la historia d'un hincha del Sporting, el trabayu analiza'l tema de la rellación ente violencia, fútbol y los movimientos ultres. Trabe informó a Europa Press de que'l trabayu aguaño ta distribuyéndose nesta primer edición poles principales llibreríes.
   
Con esta obra l'autor amuesa'l so deséu de que la obra aporte una visión diferente sobro'l mundu de los ultres y les hinchaes, amás d'arrimar al públicu mozo la lliteratura asturiana, por ser ésta una temática "cuasi virxe" n'España.
   
Artime esclaria tamién, en declaraciones a Europa Press, que la novela nun fala de los Ultra Boys, los ultres del Sporting de Xixón. "Ye daqué que m'entrugó abonda xente. Trátase d'un personax imaxinariu, metíu nun grupu imaxinariu qu'afala a un Sporting nuna situación deportiva imaxinaria", comentó. "Los paralelismos que se faigan cola realidá sedrán a llibre xuiciu del llector", añadió.

Comparte...                                    

Enllaz permanente