La Coordinadora Ecoloxista refuga l’ampliación de la Cantera de Peridiella

Agostu 26, 2010 por Xicu Ariza

La Coordinadora Ecoloxista d’Asturies vien d’espresar el so rechazu pa cola nueva ampliación de la Cantera de Peridiella, asitiada en Piloña. El colectivu presentó alegaciones a la escontra d’esta obra nel estudiu d’impactu ambiental.

Dende la coordinadora denuncien qu’esta cantera yá tuvo una ampliación en 2004 que según Aridos, empresa solicitante, cubría les sos necesidades por 17 años. Sicasí, la compañía piloñesa pidió una nueva ampliación recientemente. Pa la coordinadora esto “acercaría de mou importante la polución a los pueblos cercanos de Peridiella, el Llano, Vallin, el Corralón y San Martín”.

“L’actual cantera vien incumpliendo casi toles condiciones impuestes na so última ampliación”, denuncien los ecoloxistes, polo qu’entienden que “nun se pue permitir una ampliación d’una cantera si nun se cumplen les condiciones impuestes enantes”.

Ruíu abondo de la esplotación por mor de los españíos y el pasu de maquinaria pesada, impactu nel sistema hidrolóxicu de la fastera, la non restauración de los espacios esplotaos y el importante dañu paisaxísticu, son dalgunos de los aspectos qu’incumplen la llexislación vixente y que la Coordinadora Ecoloxista d’Asturies denuncia.

Responsabilidá del Principáu
“Hasta agora’l Principáu nun fixo l’obligáu Plan de Seguimientu y Vxgilancia ambiental qu’afite’l cumplimientu de les indicaciones y medides protectores y correctores impuestes”, señala la organización ecoloxista. Asina ye como tachen al Gobiernu asturianu de ser tolerantes cola cantera y esixen que “nun s’acepte ampliación nenguna mentanto nun se cumplan toles condiciones impuestes enantes”.

Comparte...