La ONX denuncia un aumentu de les restricciones d'Israel a Gaza

Mientres los caberos diez años l'Exércitu d'Israel aumentó les restricciones d'accesu a Gaza cola intención d'impidir los atentaos contra Israel de facciones armaes palestines.

Asina lo afita un informe publicáu esti xueves pola Oficina de Naciones Xunées pa la Coordinación d'Asuntos Humanitarios (OCHA).
  
L'estudiu, realizáu ente marzu y abril d'esti añu, y completáu col análisis d'otres fontes, afirma que dende 2008 los palestinos tuvieron prohibíu total o parcialmente l'accesu a ciertos territorios, estimándose nun 17 por cientu los terrenos de la Faza de Gaza y nun 35 por cientu de la so tierra agrícola. Amás, los pescadores tienen totalmente prohibío l'accesu a cuasi el 85 por cientu de les fasteres marines a les que tienen derechu d'alcuerdu colos Alcuerdos d'Oslo, según l'informe.
  
La OCHA señala qu'al menos 178.000 persones, el doce por cientu de Gaza, vense directamente afectaes pol réximen d'accesu impuestu pol Exércitu israelí. Esplica que les restricciones d'accesu faense mediante 'disparos d'alvertencia' pa mantener alloñaos a los civiles, "pero dende la ofensiva israelí de xineru de 2009, l'Exércitu finó cola vida de 22 civiles y mancaron a otros 146 nestes circunstancies".
  
Amás, denuncia que les autoridaes israelíes nun informaron a la población sobre los llímites precisos de les zones restrinxíes y les condiciones poles que se permite o refuga l'accesu.

La erosión del terrén agrícola obligó a les families afectaes a desendolcar dellos mecanismos col oxetivu de xenerar ingresos alternativos. "Delles d'estes práctiques son de gran esmolecimientu, como la reducción na cantidá d'alimentos consumíos, los cambios na dieta, la duración de la escolarización nos menores y una mayor inclinación de los pas a casar a les sos fíes a una edá más temprana", afirma l'informe.
  
El réximen d'anguaño tamién afecta al accesu a les estremaes escueles, siete de les que tán dientro de les fasteres restrinxíes. "La seguridá de los estudiantes y del personal qu'atiende estes instituciones, la calidá la educación y el nivel del progresu educativu resultaron bramente dañados por culpa la esposición frecuente al fueu israelí que tien por oxetivu a los civiles presentes nes zones abiertes, yá seyan agricultores o milicianos", añade l'informe de la OCHA.
  
Asina, el documentu indica que pa entamar a tratar la grave situación d'un de los segmentos más vulnerables de la población de Gaza, deben retirase por completo les restricciones d'anguaño qu'esisten sobre los civiles nos territorios y nes zones marítimes. "Toles partes deben cumplir les sos obligaciones en virtú del Derechu Humanitariu, incluida la implementación total de les resoluciones de la ONU", fina, y apunta a que sedrá necesaria una asistencia humanitaria a llargu plazu y con unos oxetivos más concretos.

Comparte...                                    

Enllaz permanente