El Conseyu Regulador diz que nun tien nengún problema col asturianu

La denominación Vinu de Cangas diz que nun tien nengún problema col etiquetaxe n’asturianu del vinu Ḷḷumés, y diz que’l vetu vien pola so calificación y orixe.

Depués de qu’este mediu asoleyara que’l Conseyu Regulador del Vinu de Cangas vetara la presencia del vinu Ḷḷumés de Bodegas Obanca na IV Feria del Vinu de Cangas por tar etiquetáu n’asturianu, la entidá, al traviés d’un comunicáu dafechu n’asturianu, diz qu’en dengún momentu prohibieron l’asistencia de la bodega, “senon que namái  se ḷḷe comunicóu a la bodega que dous de los sous vinos, l’Obanca  2009 ya’l Ḷḷumés 2008, nun podían tar presentes no eventu”.

Según indiquen, l’Obanca 2009, etiquetáu en castellán, nun  foi calificáu como Vinu de Calidá de Cangas por mor de requisitos de trazabilidá y fechura. Mientres que Ḷḷumés 2008, foi etiquetáu como vinu monovarietal verdéu prietu, “sicasí acordies conos se ḷḷibros oficiales d’esta denominación yía un vinu multivarietal feito a partir de 4 castras distintas”.

“El cumplimientu del reglamentu del Vinu de Calidá de Cangas yía  imprescindible pa que un vinu se pueda comercializar como tal, amás, sabemos que denguna de estas dúas etiquetas cuntan cona aprebación del departamentu correspondiente de la Conseyeiría de Mediu Rural ya Pesca, non porque nun foran autorizadas senón porque simplemente nun fonon presentadas pa la súa revisión, dalgo qu’ía  obligatoriu acordies cono nuesu reglamentu”, afirmen dende’l Conseyu Regulador.

La entidá diz qu’en nengún momentu punxeron impedimentu al etiquetáu n’asturianu, “outra miente yía un tema  no que nun tenemos competencia”. Indiquen que la so misión ye controlar l’orixe, la trazabilidá y la calificación de los vinos y velar porque l’etiquetáu informe sobre las carauterístiques riales del vinu, “l’idioma en que tea feitu  yía indiferente pa nós, inda hai botellas de Vinu de Cangas con etiqueta n’inglés”.

Al empar, quieren amosar el so sofitu al asturianu, “yía evidente cuando dende este ente tamos trabayando pa presentar l’anu qu’entra una nueva páxina web en tres ḷḷinguas: asturianu, casteḷḷanu ya inglés; ya el nuesu boletín”.
 
El vetu

El responsable de Bodegues Obanca, David Marcos, denunció al traviés d’Asturies.com, que recibiera una carta del Conseyu Regulador onde esixien a la bodega tapar les etiquetes n’asturianu del vinu Ḷḷumés y prohibién vendelu na IV Feria del Vinu de Cangas, polo que la bodega decició nun participar con nengún de los sos productos.

Comparte...                                    

Enllaz permanente