UNA pide estabilidá pa los servicios de normalización

Pa UNA, los datos de la web de Ḷḷena amuesen que cuando s’ufierta asturianu los ciudadanos escueyen el so usu. Amás, piden estabilidá pa los Servicios de Normalización.

Unidá Nacionalista Asturiana (UNA) quier tresmitir públicamemte la so felicitación al Conceyu de Ḷḷena pol ésitu de la versión n'asturianu de la so páxina web oficial na que, según datos del propiu conceyu, el 60% de les visites fueron realizaes n'asturianu, “lo que demuestra, una vegada más, que cada vez que s'ufierta a la ciudadanía la posibilidá d'utilizar l'asturianu ensin torgues y facilitando el so usu n'igualdá col castellán, un númberu importante de ciudadanos y ciudadanes escueyen l'usu del asturianu, a pesar de que solo un tanto por cientu bien baxu de los asturianos tán alfabetizados na nuestra llingua”.
 
Al tiempo, UNA quier facer notar la importancia de la presencia de los Servicios de Normalización Llingüística nos distintos conceyos, y afirmen que Ḷḷena foi un conceyu pioneru no que cinca a la normalización llingüística. Asina dende la organización reclamen la presencia d'esti tipu de servicios pa tolos conceyos asturianos, en situación d'estabilidá llaboral pa caún de los sos técnicos.
 
Amás, ponen como exemplu l’ésitu de la programación n'asturianu na TPA, o a l'acoyida de caúna de les ufiertes d'asturianu que se realicen na educación reglada, “que demuestra bien a les clares qu'esiste una demanda social real d'asturianu, pese a que dende la mayoría de les instituciones públiques esisten innumberables torgues pal accesu o l'usu del asturianu nunes condiciones dignes”.
 
Dende UNA reclamen a toles instituciones asturianes qu’ufierten a la ciudadanía en xeneral la posibilidá d'utilizar l'asturianu con normalidá en tola Alministración Pública, y que se potencie y estimule'l so usu, “como elementu d'una política de normalización que toos dicen defender cola pallabra pero que tien un reflexu bien probe nos fechos”.
 
Pa cabu UNA reivindica que la única igualdá de derechos real solo puede asegurase al traviés de la oficialidá, “que ye la única ferramienta llegal que puede asegurar la llibertá d'elección y los derechos de los falantes d'asturianu”. Nesi sentíu, UNA considera que'l mayor enemigu de la oficialidá ye la FSA-PSOE cola so política “reaccionaria, provinciana y acomplexada”.
 

Comparte...                                    

Enllaz permanente