El Fapas da por acabada la recuperación del osu pardu en Proaza

El Fapas dio por acabada la recuperación de la población d'osu pardu nel conceyu Proaza que se consolida como ún de los núcleos oseros más importantes del Cordal Cantábricu.

Un mínimu seguru de cuatro oses reproductores y una ventena d'exemplares qu'a lo llargo del añu transiten pel territoriu, tornen a esti conceyu nun puntu estratéxicu na recuperación del osu pardu, según informó'l Fondu pa la Proteición de los Animales Xavaces (Fapas).
  
El Fapas entamó los trabayos de recuperación del osu en Proaza nel Valle del Trubia, agora conocíu como 'Valle de los Osos', nel añu 2004, nun esistiendo naquellos momentos constancia de que los osos reproduxérense nel territoriu. Mientres cinco años siguíos desarrolló un programa de siguimientu de la especie pente medies de l'usu de cámares automátiques y analises xenéticos, contando col apoyu d'instituciones como Euronatur y Obra Social Caja Madrid.
  
Dende l'añu 2004 al 2009, algamó que polo menos cuatro exemplares d'osu pardu llegaren a reproducise dando llugar a la recuperación d'un nucleu oseru que perdiere la so reproducción a mediaos de los años 90 del sieglu pasáu.
  
La clave p'algamar esti notable aumentu de la población d'osos tuvo vinculada a la garantía de supervivencia de les críes nacíes nos últimos años, una menor mortaidá d'adultos y posiblemente la intercomunicación de les femes reproductores con otres zones oseres yá más consolidaes como son los territorios de Somiedu y Balmonte.
  
Los trabayos de siguimientu del osu pardu nel Valle de los Osos mientres l'añu 2009, dio como resultáu'l control de polo menos 26 exemplares distintos, de los que destaca que siete exemplares yeren esbardos de primer y segundu añu y subadultos, lo que mos apurre una idea del potencial de crecimientu de la población d'osos nestos  territorios.
  
Ello ye que Fapas espera que pal añu 2010, la población reproductora creza n'otros dos exemplares. Esta situación repercute directamente nel asentamientu de la población osera n'otros dos conceyos llenderos con Proaza, como son el de Santu Adrianu, que cuenta yá con una presencia constante d'osos nel so territoriu y el de Teberga, onde s'espera que pa esti añu s'alcuentre la so primer osa acompañada d'esbardos.

Comparte...                                    

Enllaz permanente