Bienveníos a una páxina onde'l protagonista ye un perru pequeñín, pero mui gallasperu.
Llámase...
¡Buf! Cuando'l rei ta de mal humor val más marchar del castiellu, porque entama a dar unes voces que faen tremar hasta les columnes.
Por ciertu, yo soi
Pol
, el perru Real. Llámenme asina porque soi la mascota del rei, anque hai delles vegaes nes que me prestaría más ser el perru del cocineru.
El rei ta mui, mui enfoscáu porque-y duel munchu un pie. Asina que yo, como soi un bon collaciu, voi a toa mecha a falar con
Roz
, el magu del Reinu.
Él, que ye mui llistu, enseguida prepara una pócima. Échala nuna botella y dizme que-y la lleve rápido al rei. Tien que la tomar toa.
El rei tovía ta más enfoscáu qu'enantes. Resulta que s'alcordó qu'esa nueche hai baille nel palaciu de los condes del
Colador
, ¡y si nun quita los dolores nun va poder baillar cola reina! Pega otru glayíu y cae una llámpara al suelu...
En cuantes-y doi el beberaxu tómalu ensín respirar. "Tenga cuidáu, maxestá, nun se vaya a atragantar". Entós, ponse roxu, verde, mariellu... y de tolos colores
De sópitu, ¡pof! Daqué mui raro pasa, al rei sal-y una pata d'elefante. ¡Meca! ¡Agora sí que l'armamos!
El rei nun sabe qué decir, ta baráu. "El casu -diz él- ye que yá nun me duel, ¡pero nun puedo dir asina, con esta pata gorda, a baillar!" Yá taba a puntu de ponese a berrar otra vegada, cuando llegó la reina, que se llama
Flor Mariella
.
"¡Qué chulo vas maxestá!" diz la reina. Quedamos toos atontaos, ¿será que nun-y vio la pata? "Vas mui a la moda -siguió ella-. A min siempre me prestó muncho la
pata d'elefante
, nos mios tiempos xóvenes yo tamién tenía unos pantalones de
pata elefante
.
Y asina colaron los dos pal baille. Ella punxo los sos vieyos pantalones de
pata elefante
y el rei llevó la so pata elefante. Ganaron el primer premiu del baille.
¡Y menos mal!, porque si non llega salir too bien, el rei yera capaz de facer comigo un
perritu caliente
.
