DEPRENDE ASTURIANU
Tema IV: El llamáu neutru materia
N'asturianu, amás del masculín y el femenín, los
sustantivos (nomes) pueden presentar el llamáu xéneru
neutru. Esta característica consiste en que dellos nomes asturianos
non cuntables "de materia", en determinaes posiciones presenten una
concordancia que nun ye masculina nin femenina.
Pero nun podemos dicir que'l neutru seya un xéneru porque tolos nomes
que son neutros son, al empar, masculinos o femeninos; el neutru nun
s'opón al masculín y al femenín sinón que convive
con ellos.
El xéneru neutru nun se manifiesta, sacantes unes poques escepciones,
nos propios nomes sinón nos axetivos que los acompañen. Los
axetivos qu'acompañen a nomes neutros acaben xeneralmente na vocal -o,
en cuenta de -u que ye la marca del masculín y -a que ye la marca del
femenín.
Asina: el neñu ye malu, la mesa ye mala, el
carbón ye malo
El xéneru neutru aparez entós nos axetivos qu'acompañen a
les pallabres que se refieren a coses que nun son individualizables; que nun se
pueden cuntar o dividir n'unidades.
L'aparición d'una corcordancia en neutru ye independiente de que'l
nome seya masculín o femenín. Sólo importa que seya
cuntable (individualizable) o non.
Asina alcontramos nomes masculinos que son tamién non cuntables y por
ello l'axetivu col que concordien tien terminación -o.
Pan duro non *pan duru (pan ye un sustantivu non
cuntable o "de materia").
El maíz ye ruino non *el maíz ye
ruinu (maíz ye un nome non cuntable o "de
materia").
Pero tamién hai nomes femeninos que son non cuntables o "de
materia", polo que concordien en -o
L'arena ta seco non *l'arena ta seca
La lleche cuayao non *la lleche cuayada
Dende un puntu de vista científicu nun se pue dicir que'l neutru seya un
xéneru, sinón una categoría independiente del
xéneru y del númberu. Por razones pedagóxiques vamos
caltener la definición tradicional que lu considera un xéneru.
¿Cuándo aparez el neutru?
La concordancia del nome non cuntable o "de materia", col axetivu
neutru namás se da en posiciones concretes:
a) Axetivu pospuestu, atributivu o en función nominal; ye dicir, cuando
l'axetivu va tres del nome, non primero.
la lleña seco
la sidra nuevo
el carbón bono
Si l'axetivu se pon delantre del nome (posición antepuesta) la
concordancia neutra desaparez y l'axetivu tien la forma masculina o femenina;
la seca lleña
la nueva sidra
el bon carbón
b) Nos nomes singulares.
Nos plurales nun existe la concordancia neutra.
Nomes con doble posibilidá
Hai nomes que pueden referise xenéricamente a un conxuntu non
dividíu n'unidaes, o una clas y por ello ser nomes de materia o
cuntables y al empar referise a unidaes polo que son tamién incuntables.
Estos nomes suelen ser nomes cuntables (masculinos o femeninos) que pasen a
espresar conceutos non cuntables. Asina los nomes de fruta o vexetales
presenten la doble posibilidá.
La so concordancia va ser en neutru o non según seyan una o otra cosa.
La fueya seca (una fueya) / La fueya seco (conxuntu de fueyes)
Apúrrime una fueya seca / Apúrrime la fueya
seco (como materia)
El café malu (un café) / El café malo (clas
de café)
Nunes poques ocasiones esta doble posibilidá manifiéstase
tamién nel nome pola so terminación en -o
Un fierru ferruñosu (nome cuntable)/
Fierro ferruñoso
Un filu blancu (nome cuntable)/ Filo blanco
Un pelu roxu/ Pelo roxo
Exemplos de nomes neutros
Nomes non-cuntables qu'indiquen materia, cantidá indeterminada o
valor coleutivu;
l'arena, la llana, la xente, el vinu, la lleche, la madera, el
carbón, la herba, la carne, la fruta, la fariña, el trigu, la
sidra, la lleche, el cristal, el papel, la ropa...
Emplegu de los axetivos neutros
Amás de na corcordancia colos nomes "de materia" los axetivos
neutros (los acabaos en -o) úsense tamién n'asturianu
nestos casos:
a) Na concordancia col infinitivu d'un verbu;
Correr ye bono
Correr tolos díes ye bono
b) Na concordancia colos demostrativos neutros esto, eso, o
aquello.
Aquello foi mui prestoso non *prestosu.
c) Na concordancia colos indefiníos neutros daqué (algo) o
nada.
Equí hai daqué feo
Equí nun hai nada feo
d) Na concordancia colos interrogativos neutros cuánto o
cuálo:
¿Cúalo ye barato?
e) Na concordancia con una oración nominalizada por /que/:
Que bebas ye malo
f) Si l'axetivu ta precedíu pol artículu neutru lo:
lo ferruñoso (la ferramienta ferruñoso) tirélo
lo asturiano (la sidra asturiano) gústame más que lo otro
Exercicios
Pon l'axetivu nel xéneru que-y correspuenda
Esa camisa ta puerc... (Esa camisa está sucia)
Corta la lleña que yá ta sec... (Corta la
leña que ya está seca)
¡Cóm… me presta la lleche
cuaya...!(¡Cómo me gusta la leche cuajada!)
Dame un papel blanc… pa escribir(Dame un papel
blanco para escribir)
Vete a mercar papel blanc...(Vete a comprar papel
"de color blanco")
Pónesme un poc... de carne guisa…(Me pones
un poco de carne guisada)
Esa bufanda ye mui guap...(Esa bufanda es muy guapa)
Lo guap… gústa-y a tol mundu(La belleza le
gusta a todo el mundo)
El neñu de Xulia ye mal…, mal...(El
niño de Xulia es malo, malo)
|
