DOMINIU LLINGÜÍSTICU

Asturies

Asturies (1.100.000 h.) ta asitiada nel Noroeste de la Península Ibérica.
Dende 1981 ye oficialmente una comunidá autónoma del Estáu Español, col nome de Principáu d'Asturies.
L'asturianu, la so llingua propia, pertenez al grupu de les llingües romániques, como'l gallego-portugués, el castellán, l'italiano o l'aragonés.
Los más de los datos ufiertaos n'espaciu y tiempu refiérense al territoriu del Principáu d'Asturies, al nun esistir cuásique datos del restu del dominiu.

Llión

Llión ye ún de los territorios hestóricos onde se fala la llingua asturiana, tamién conocida por ello ( y por ser la llingua del antiguu reinu de Llión) como llionés o astur-llionés.
Al entamu del sieglu XX tol Norte y Oeste de la provicia de Llión y l'Oeste de la de Zamora caltienen la so llingua hestórica en bon estáu.
Anguaño la castellanización ye pergrande y la llingua caltiénse nun estáu precariu y ensin protección llegal nin reconocencia de les autoridaes de la Comunidá Autónoma de Castiella y Llión.
Cuéntase en dellos miles el númberu de falantes.
L'asociación Facendera pola Llingua vien desenvolviendo nos últimos años un llabor recuperador na capital de la provincia y poniendo cursos p'adultos.
El Conseyu de la Mocedá de Llión, que tien denominación billingüe, tamién entamó un cursu de llingua p'adultos en collaboración cola asociación llionesa Conceyu Xoven.
Col términu Llión referirémonos nestes páxines tantu al territoriu asitiáu na provincia de Llión como al de Zamora.

Miranda

La llingua cáltuvose, col nome de Mirandés, nesti conceyu del este de Portugal.
Esta zona portuguesa tuvo habitada na dómina prerromana por tribus ástures y foi parte, mesmamente tiempu depués de consiguida la independencia de Portugal, de la diócesis d'Astorga.
La cámara Municipal de Miranda del Douru vien sofitando nos últimos años la espublización de llibros en Mirandés.
La escuela d'educación primaria de Miranda pon l'asignatura de llingua mirandesa como voluntaria.
El númberu de falantes cuéntase nunos 5.000.

Pa más información sobre'l dominiu llingüísticu écha-y una güeyada al mapa de Menéndez Pidal. Nesti mapa represéntense les más de les isogloses del dominiu llingüísticu nel so conxuntu. La situación de la llingua qu'indica'l mapa ye la de finales del sieglu XIX.