ARCHIVU ORAL

Esti ye un proyectu que naz dientro de la sección "Espaciu y Tiempu de la Llingua Asturiana", pero que siendo complementu d'ella, quier convertise al mesmu tiempu en testimoniu vivu de la realidá llingüística asturiana. Presentamos equí una riestra de grabaciones de falantes asturianos. Los materiales proceden de fontes mui diverses; dellos son frutu de trabayos de campu esclusivamente llingüísticos; otros de recopilaciones de material etnográficu o históricu. Toos ellos tán escoyíos col aquel de ser representativos de les variedaes dialectales y de la situación sociollingüística del idioma, buscando siempre les situaciones cotidianes espontanes. Pola mor d'ello, la calidá de soníu nun ye siempre la más afayadiza, anque tratamos de "llimpiar" les grabaciones no posible, pa facilitar la comprensión.

Nesti sen, xunto col testimoniu sonoru, úfrese tamién una trescripción de los pasaxes escoyíos, lo qu'al mesmu tiempu fai más amañosu l'estudiu. Tanto nel tratamientu de los pasaxes sonoros como na trescrpción de los mesmos, el criteriu principal ye'l del respetu escrupulosu a la realidá llingüística, polo que nel casu de los primeros ufiertámoslos ensin más retoque que'l puramente sonoru, y nel de les segundes, dándo-yos un tratamientu "foneticista" pero accesible pal profanu. Esto ye, respétense les Normes Ortográfiques propuestes pola ALLA siempre qu'éstes nun choquen cola representación d'un trazu interesante dende'l puntu de vista fonéticu o morfosintácticu, casu nel qu'optamos por representalu siempre.